ڪنهن به مخصوص نسلي گروه طرفان ٻئي مخالف نسلي گروهه کي ڪنهن خاص علائقي مان بي دخل ڪندي هڪ نسل تي ٻڌل آبادي ءَ جو غلبو پيدا ڪرڻ لاءِ اختيار ڪيل ۽ ڳڻيل ڳوتيل پاليسي ، جنهن ۾ اڳرائي پسند ڌر طرفان طاقت ۽ تشدد جي زور تي پنهنجو مقصد حاصل ڪيو وڃي . عام طور اهو عمل اذيت ، اغوا، جبري نظربندي ، قتل ، عدالت کان مٿانهين ڪاررواين ، مخصوص علائقن ۾ آبادين کي واڙڻ ، شهري آباديءَ جي جبري ملڪ- بدري ، فوجي آپريشن يا اهڙي قسم جي آپريشن جي ڌمڪين ، مخالف نسل جي ماڻهن جي ملڪيت جي ساڙ ٻار ۽ جنسي ڏاڍائيءَ ذريعي ادا ڪيو وڃي ٿو . هي اصطلاح 1992ع ۾ عالمي خابرو ادارن ۾ يُوگوسلاويه جي حوالي سان تمام گهڻو ڪتب اچڻ سسب مشهور ٿيو ، پر اهو عمل ان کان اڳ به چالو رهيو آهي . جديد دور ۾ ’يُوگو سلاويائي گهرو لڙائيءَ ‘ وارن ڏهاڙن ۾ سرب اڪثريت طرفان بوزنيائي مسلم ٿورائيءَ خلاف ’نسلي صفايي‘ جي ڪارواين سڄي دنيا جو ڌيان ڇڪرايو . هي عمل سڄي دنيا ۾ غير مهذب ۽ انسان دُشمن سمجهيو وڃي ٿو ۽ بين الاقوامي قانون ۾ ان کي ’انسانيت خلاف ڏوهه‘ طور ڳڻيندي ذمي- وار ڌرين تي ’عالمي عدالت انصاف‘ سميت ٻين خاص عدالتن ۾ مقدما هلائي کين سزائون ڏنيون وينديون آهن.